Mynd i’r Ysgol gyda Chyflyrau CYs

Mae addysg yn bwysig! Ond mae mynd i’r ysgol, gweld ffrindiau a chymdeithasu yn ffactor hanfodol yn ein lles hefyd. Mae tystiolaeth yn dangos bod mynd i’r ysgol yn dda i’ch iechyd corfforol ac emosiynol.

Mynd i’r Ysgol gyda Chyflyrau CYs

Gall y boen neu’r blinder a achosir gan broblemau esgyrn, cyhyrau a chymalau wneud dysgu ac addysg yn heriol.   Y gwir yw bod llawer o blant yn profi poen cyhyrysgerbydol yn ystod eu plentyndod o ganlyniad i dwf a datblygiad eu cyrff, fodd bynnag, os nodir y problemau hyn yn gynnar, ac y dilynir cyngor priodol, ni ddylai fod angen amser allan o’r ysgol ar blant. Yn wir, mewn sawl achos bydd ysgolion yn hapus i gefnogi a chynorthwyo gydag adferiad y plentyn.

Mae llawer o bobl yn credu bod angen iddynt fod yn holliach (100%) neu’n ‘ddi-boen’ cyn iddynt fynd i’r ysgol.  Gyda’r rhan fwyaf o gyflyrau esgyrn, cyhyrau a chymalau, nid yw hyn yn wir.  Mae mynd i’r ysgol yn rhan bwysig o adsefydlu ac adfer ac mae yna bethau y gallwch feddwl amdanynt i’ch cefnogi i aros yn yr ysgol.

Dyma rai pethau i’w hystyried os oes gennych broblem gyda’ch cyhyrau, esgyrn neu gymalau sy’n cael effaith ar eich addysg a’ch bywyd ysgol:

Siaradwch â’ch ysgol

Os ydych chi’n cael problemau, siaradwch â’ch ysgol am y pethau rydych chi’n eu cael yn anodd.  Efallai y bydd ffyrdd gwahanol y gallech wneud eich gwaith ysgol gan ddefnyddio ‘addasiadau rhesymol’, a gallant sicrhau bod gennych yr holl offer angenrheidiol i wneud hyn yn haws a’ch bod yn ei ddefnyddio’n iawn.  Po gynharaf y siaradwch â’ch ysgol ac athrawon, y cyflymaf y gallant drafod y broblem ac, os oes angen, rhoi addasiadau ar waith a allai eich helpu.  Gallai addasiadau i’ch amgylchedd addysgol gynnwys pethau fel:

• Newid amser cychwyn a gorffen ysgol, amseroedd egwyl neu leoliad o fewn yr ysgol a’r ystafell ddosbarth
• Gadael gwersi’n gynnar er mwyn osgoi rhuthro yn y coridor
• Cael locer i storio llyfrau yn hytrach na’u cario nhw i gyd, neu gael 2 set o lyfrau – 1 gartref ac 1 yn yr ysgol
• Newid rhai tasgau neu wersi (megis Addysg Gorfforol)
• Defnyddio cyfarpar a/neu ddodrefn penodol i’ch helpu yn yr ysgol (fel eistedd ar gadair mewn gwasanaethau yn hytrach na’r llawr, defnyddio gliniadur yn lle ysgrifennu os oes gennych broblem â’r fraich)
• Caniatáu amser i fynychu apwyntiadau iechyd ar gyfer adsefydlu
• Mynediad at unrhyw feddyginiaethau poen rhagnodedig a phriodol, neu gynnig amser yn ystod y diwrnod ysgol i berfformio unrhyw ymarferion cryfhau a roddir gan ffisio!
• Cael addasu gwisg ysgol er cysur ac i wneud gwisgo’n haws, fel joggers yn lle trowsus, bandiau gwasgod elastig neu gaeadau felcro ar esgidiau
• Cael “cyfaill” yn ystod amser egwyl ac i gerdded gyda chi rhwng gwersi – efallai y gallai eich helpu i gario llyfrau?

Os nad ydych wedi gallu mynd i’r ysgol am gyfnod, byddai’n help dychwelyd i’r ysgol dros gyfnod o amser i ailgyflwyno pob un o’r gweithgareddau y mae angen i chi eu gwneud.  Gall byw gyda phoen, hyd yn oed yn y tymor byr, arwain at gynnydd mewn blinder a allai wneud canolbwyntio yn yr ysgol yn anoddach. Gall gwahanol adegau o’r dydd wneud i rai cyflyrau CYs deimlo’n waeth felly mae’n bwysig dweud wrth staff yr ysgol. Mae trafodaeth agored, bositif a gonest gyda’ch ysgol yn allweddol i ddatrys y materion hyn yn gynnar!