ENGLISH
Mae gosod cyflymder yn ddull adsefydlu sy’n cydbwyso gorffwys a gweithgareddau mewn bywyd bob dydd i reoli symptomau fel gorflinder a phoen cronig.
Nod y cyngor canlynol yw egluro sut y gallwch wneud gweithgareddau bob dydd gartref, yn y gwaith ac ar y cyd â’ch hobïau neu fywyd cymdeithasol heb wneud eich blinder neu boen yn waeth.
Gall gorflinder a/neu boen wneud gweithgareddau bob dydd yn anodd. Efallai eich bod chi’n cael dyddiau da ac eraill sy’n teimlo’n llawer anoddach. Yn aml, gall hyn arwain at wneud gormod ar ddiwrnod da sydd wedyn yn arwain at wneud hyd yn oed llai ar ddiwrnod gwael. Enw hyn yw Cynhyrfu a Chwalu a dyma beth rydyn ni am ei osgoi. Mae angen i ni wastatáu’r gromlin er mwyn rhoi sefydlogrwydd i’ch diwrnodau chi.
Mae’r rhan fwyaf o bobl yn seilio’r hyn maen nhw’n ei wneud a faint maen nhw’n ei wneud ar sut maen nhw’n teimlo. Mae pawb yn blino. Mae i’w ddisgwyl ar ôl diwrnod caled yn y gwaith neu weithgaredd caled. Blinder yw’r hyn rydych chi’n ei deimlo pan nad ydych chi’n cael digon o gwsg. Mae blinder yn wahanol, mae’n deimlad o ddiffyg egni neu ludded sy’n digwydd hyd yn oed os ydych chi’n cael eich 8 awr lawn – nid oes modd ei leddfu gyda chwsg. Yn aml, mae pobl sydd â phoen neu flinder hirdymor yn gwneud mwy pan fydd y boen yn lleihau neu pan fyddan nhw’n teimlo’n llai blinedig. Gall hyn olygu eu bod yn aml yn gorwneud pethau. Mae hyn wedyn yn arwain at gynnydd mewn poen a/neu flinder a gostyngiad mewn gweithgarwch.
Nod y cyngor canlynol yw eich helpu i reoli eich gorflinder/poen er mwyn i chi allu gwneud y gweithgareddau yr ydych am eu gwneud heb wneud eich symptomau’n waeth.
Mae gorflinder yn wahanol iawn i deimlo’n flinedig. Mae’n deimlad llethol nad yw’n cael ei leddfu gan gwsg. Nid yw lefel y gorflinder rydych chi’n ei deimlo yn gymesur â’r lefelau o weithgaredd rydych chi wedi’u gwneud. Gall gorflinder olygu meddwl niwlog, mwy o boen a theimlad cyffredinol o ddiffyg egni.
Gall gorflinder neu boen olygu na fyddwch yn gwneud digon o weithgareddau. Gall gormod o orffwys wneud symptomau gorflinder a phoen yn waeth. Bydd eich cyhyrau’n mynd yn wannach ac mewn tro yn achosi mwy o boen. Gall hyn ei gwneud hi’n anoddach fyth i ddechrau symud!
Er mwyn rheoli blinder a phoen cronig yn effeithiol, mae angen i ni feddwl am ein lefelau egni.
Mae swm penodol o egni ar gael i bob person bob dydd. Mae fel rhyw fath o fatri egni.
Yn aml bydd gan berson sydd â gorflinder neu boen cronig fatri egni llai sy’n gwagio’n gyflymach ac yn cymryd mwy o amser i ail-wefru. Fel batri ar hen ffôn symudol!
Gall gosod cyflymder ein gweithgareddau a’n defnydd o egni ein helpu i wneud mwy bob dydd. Mae angen i ni feddwl am gadw ein batris yn ddigon llawn a pheidio â gadael iddyn nhw ddraenio’n llwyr – gall hyn ein harwain i mewn i gylch Cynhyrfu/Chwalu eto. Mae angen i ni wneud pethau ychydig yn wahanol.
I’n helpu ni Osod Cyflymder ein gweithgareddau gallwn ddefnyddio’r 4 ffactor yma;
Mae’r rhain yn eich helpu i gynllunio, yn eich stopio rhag gwneud gormod ac yn sicrhau bod gennych egni ar ôl ar ddiwedd y dydd.
Cynllunio
Ystyriwch beth rydych chi eisiau ac angen ei wneud bob dydd. Ar ba adeg o’r dydd ydych chi ar eich gorau?
Blaenoriaethu
Beth sy’n rhaid gwneud?
Beth rydych chi eisiau gwneud?
Gosod cyflymder
Torri gweithgareddau’n flociau gyda chyfnodau gorffwys.
Caniatâd
Rhowch ganiatâd i’ch hun i ofyn am help ac i orffwys. Gallwch ddweud NA. Does dim rhaid i chi ei wneud yn berffaith.
Ffordd arall y gallech chi ddefnyddio’r ffactorau hyn yw drwy wneud rhestr o’ch holl hoff bethau i’w gwneud. Gallech wedyn roi sgôr allan o ddeg i’r gweithgareddau hyn am faint o egni maen nhw’n ei ddefnyddio a sgôr arall am faint rydych chi’n eu mwynhau.
Wrth gynllunio’ch diwrnod, mae’n bwysig cynnwys rhai gweithgareddau corfforol. Mae’n dda i ni gadw ein cyrff i symud yn rheolaidd i leddfu poen a chadw ein cyhyrau’n gryf.
Gall gweithgareddau gynnwys mynd i’r gampfa, mynd am dro neu gerdded o gwmpas eich ysgol hyd yn oed. Mae’r rhain i gyd yn fathau o weithgaredd corfforol.
Gwnewch yn siŵr eich bod chi’n dewis gweithgaredd rydych chi’n ei fwynhau, un lle gallwch chi orffwys os oes angen, a chofiwch, mae rhywbeth bob amser yn well na dim byd.
Os hoffech gael copi printiedig o’r wybodaeth uchod, defnyddiwch y ddolen hon
